مش ناقصاكوا الله يقرفكوا

لو سمحت يا كابتن-

نعم؟-

بطاقتك؟-

بطاقتى ضايعه إتفضل كارنيه الكليه-

ممكن أفتش الشنطه؟-

إتفضل-

انت جاى منين؟-

من الشغل-

بتشتغل إيه؟-

بشتغل فى مكتب هندسى-

أومال إيه الفوطه والشامبوا والحاجات دى؟-

لا عادى أصلى ببات من الشغل أصلى مش من القاهره-

وإيه اللى إنت لابسه دا؟؟-

إيه؟-

الطاقيه دى –

لا دا علشان شعرى طويل –

طيب إتفضل معايا و إستنى هنا شوية-

كل دا حصل وانا راجع أول إمبارح من القاهره …. كنت فى محطة مترو جمال عبد الناصر …. ومن غير سبب … بس يمكن علشان الآيس كاب الغريب اللى كنت لابسه و شوية الشعر العبط اللى دقنى

شوية كدا ولاقيت الدقون عماله تهل عليا

كل شوية واحد بدقن كدا ييجى يقف جنبى

ومنهم واحد عمال يقول عايزين نمشى علشان نلحق الصلاه

معلش ممكن أعمل تليفون –

مش مستهله إنت شوية وهتمشى –

طيب ماشى هعمل تليفون مافيهاش حاجه –

صدقنى لو هتفضل معانا هخليك تتصل بيهم إنما ملهاش لازمه تقلقهم وعد لو هتفضل هسيبك تكلم اهلك … دا واجبى –

واجبى؟؟ واجب إيه ياعم الحج صباح الخير …. الأخ كان لابس مدنى ومعاه واحد رتبته أعلى ولا بس مدنى وإنسيال دهب

لو سمحت هو أنا هفضل واقف هنا كتير ولا إيه ؟-

لالا شوية وهتمشى على طول –

طب هو انا واقف هنا ليه أساسا ؟ –

على مانكشف على بطاقتك بس –

كل الناس اللى واقفه مشيت إلا إتنين أنا والراجل اللى عمال يقول عايزين نلحق الصلاه

و بنيى وبينكوا انا كنت مقلق جدا

وأساسا أنا قرفان ومش ناقص أى مشكلة من أى نوع

وإحقاقا للحق الراجل كان بيتعامل بإحترام وجالى كام مره يقوللى ما تقلقش

بس هو أساسا ليه يوقفنى؟

ربنا يخليلنا قانون الطوارىء

ويباركلنا فى قانون الإرهاب