لما إتفرجت على برنامج 90 دقيقة اللى كان مستضيف وائل عباس ، إستفزنى جدا إسلوب معتز الدمرداش ، معتز كان بيتكلم مع وائل عباس عن الكليب – اللى مش متابع الموضوع يضغط هنا – وبعدين دقيقة وقلب على وائل وبقى وائل هو المتهم إنه عايز يلفق الكليب للشرطة وخلاص ، مع إن اللى حصل قبل كدا بيقول عكس كل دا ، لما وائل نشر كليبات التعذيب قبل ماطلعش ولا واحد فيهم متفبرك ، دا غير إن فيه أكتر من كليب وائل نشره وبعديها الظباط إتحاكموا فيها يبقى الحكاية مش إن وائل عايز يظيط أو يكمل ظيطت التعذيب
لما إتفرجت على البرنامج و حاولت أتصل ماعرفتش ألاقى الرقم ، إفتكرت إنهم عرضوا الرقم وأنا ما أخدتش بالى ، بس اللى حصل إنهم ما عرضوش الرقم فعلا ، وائل كتب عنده حاجه أغرب من دا إن الناس اللى عرفوا يتصلوا بالبرنامج لان رقم البرنامج معاهم من قبل كدا ردت عليهم الموظفة المسؤلة وسألتهم هتقولوا إيه ؟؟ أو انت مع كلب ولا ضده ؟؟ ولو مع الكليب يقولك هات رقم تليفونك وهنكلمك ، الكلام دا على لسان وائل زى مانشر ، وائل بيقول كمان إنه معاه شهود
لما وائل كتب عنوان الموضوع ” ضابط يجبر فتاه على خلع ملابسها ” كتب برده فى الموضوع إن مرسل الكليب هو اللى بيتوقع إن دا ظابط
والحقيقة بقى إن أغلب الى شافوا الكليب شايفين إنه ظابط أولا علشان المسدس وثانيا علشان الطريقة وإسلوب الضرب وإستسلام البنت اللى فى الكليب ، يبقى لما وائل ماغلطش وماينفعش نقولة ياوائل انت عايز تظبط حالك على قفا ضباط التعذيب
لو إفترضنا إن الكليب دا مش لضابط شرطة ،بس فيه واحد بعته لوائل وقالة إن دا ضابط شرطة يبقى المفروض وائل يعمل إيه؟؟ ماينشرهوش ولا ينشره ؟ أعتقد إن دور الصحفيين أو الإعلاميين عموما إنهم بيقدموا لجهات التحقيق أى حاجه يشوفوا إن فيها تجاوز علشان يشتغلوا عليها ، طيب لما يكون فيه شك بنسبة كبيره – على الاقل بالنسبة لوجهة نظر وائل – إن الكليب دا لأحد أفراد الشرطة ، يبقى المفروض يعمل إيه؟؟ مش دا يقوى دافع وائل إنه ينشر الكليب ؟
اللى خلانى أكتب الموضوع حاجتين ، الأول إنى لاقيت فيه ردود أفعال على اللى حصل مع وائل مع معتز وناس كتير بدأت تشك فعلا إن الداخلية ممكن تستغل اللى حصل ضد وائل ، الحاجه التانية إن رغم كل اللى حصل وبيحصل لوائل ماخليتهوش يوقف سواء كانت الإتهامات اللى أنا سمعتها بنفسى وناس كتير سألونى عليها بإعتبارى مدون أو العروض اللى إتعرضت على وائل فى الصحافة بشرط إنه يقفل مدونتة ، مش عايز أقول كمان إن وائل بسبب مدونتة أو سبب رئيسى من ضمن الأسباب إنه لحد دلوقتى ماعملش أى حاجه فى حياتة العملية إطلاقا.
حاجه تانية مهمه ، رغم إن اللى انا لمستة من كل الناس العاديين اللى اتفرجوا على البرنامج إنهم تعاطفوا مع وائل ، إلا فيه ناس تانية ، ممكن تعتقد إن فعلا المدونين دول ممكن يكونوا بيلفقوا ، أو ممكن دا يأثر فى مصداقية المدونين
وائل هيقول شاهدتة فى النيابة ، وسواء الشخص اللى فى كليب كان ظابط أو ماكنش ففى جريمة حصلت ، ماينفعش نحاسب وائل إنه كشفها