إمتحانات .. ملل ..إحباط .. مشاكل .. خنقه
كعاة كل سنه
بداية الصيف المقرفه
مش عارف ليه لما الجو بيتغيير من الصيف للشتا أو العكس بيأثر جدا فيه
بحس إنى مخنوق إنى عايز حاجات كتير مش عارف هى إيه بس عايزها
الأكثر قرفا
تزامن دخول الصيف والإمتحانات
مافيش نوم
مافيش وسط البلد
مافيش نت ولا مدونات
مافيش تسكع مع أصحابى
مافيش أى حاجه
مافيش غير مذاكرة ، وحتى مش متظبط فيها
بخطف نص ساعه بعد كل إمتحان أدخل النت أشوف إيه اللى بيحصل فى الدنيا
أشوف اللى كتبه الناس فى مدوناتهم
أسمع شوية أغانى لكامليا جبران
أكلم حد من أصحابى
كل دا فى نص ساعه
وأرجع أنام لانى لسه مانمتش من إمبارح
اصلى لسه مخلص إمتحانى حالا
النهارده بالصدفة لقيت حاجات فرحتنى
منعم كتب تدوينة جديده
مالك مدونته رجعت تانى تشتغل
أحد المواقع وضعت لينك لمدونتى وكتبت فيه “مدونة مصريه تتحدى السلطه الإستبداديه ..مصر وشعب مصر أولا ….الديكتاتورية والتوريث إلى مزبلة التاريخ”دا اللى هى مدونتى 🙂
ولقيت حاجه غريبه أوى
واحد سايب تعليق فى مدونة مصر الحره بيسب ويشتم فى صاحب المدونة
هو مش بإسمى بالظبط
إنما بإسم مواطن مصرى واخد على قفاه
وطبعا دا لانى مشهور ومؤثر فى الرأى العام المصرى والعالمى فإستغل إسمى 🙂
الحياه مديانى ضهوها الفتره دى
نفسى أسمع أخبار حلوة
نفسى أسمع خبر يخلينى أفرح وأضحك أوى
بقالى مده ما ضحكتش
أصحابى وحشونى جدا
نفسى أشوف ناس كتير أوى
نفسى أشوف حرنكش وعادل ورامى وأسد وجيمى وماهر وساره ووائل ومصطفى وإسلام وشادى وعبدالحى وياسر ومدحت وناس كتييييير أوى إتعودت أشوفهم
مش عارف مالى كدا الإيام دى
عايز أفضى بقى علشان أنزل وأعمل الحاجات اللى بحبها من غير ما يكونورايا اى حاجه تشغل بالى
لو حد عنده خبر حلو يعمل خير لو قالهولى 🙂
خنقتكوا إنتوا كمان؟؟