أحيانا بحس إنى مريض
وأحيانا تانيه بحس الناس هى اللى مريضه
أنزل الشارع الاقى هيصه وزاحمه وناس رايحه وناس جايه
أصلى بحب الزحمه ومش بدايق منها
أحيانا بيمر قدام عينى مشاهد بتأثر بيها
ممكن تكون حلوه وغالبا بتكون وحشه
مشاهد كتيره مختلفه
ممكن سياسه واحيانا لحظات إنسانيه
أشوف نفسى وأنا كنت مبسوط لما كنت مع نفسى
ويمكن أشوف مظاهره
وساعات الحكايه بتكبر وتخرج من أيدى
وألاقينى مع الناس تحت قصر العروبه
وساعات بفكر فى اللى جوايا
أنا إيه؟؟ عايش ليه؟؟عايز إيه؟؟
أنا صح ولا غلط؟؟!!
يعنى بعيش كأنى لوحدى
إكتشفت إنى بقيت حاجه كدا زى ….
زى ورقة الشجره
أو ….
أنا بقيت إنسان إفتراضى
خلقت لنفسى عالم إفتراضى
عالم بعيد عن كل حاجه
قريب منى أنا بس
أحرك عناصره بصوابعى زى عرائس المريونت
ماحدش هيقوللى إنت بتعمل إيه ولا ليه
عالم أحقق فيه أحلامى أشوف فيه كل اللى انا عايزة
أشوف ناس صافيه
اصحاب صافيه
ومش بعيد أشوف فيه مصر جديده من غير مبارك
عالم بشوف فيه كل حاجه انا عايزها
ممكن سياسه وممكن صداقه وغالبا حبة إنسانيه
عالم إفتراضى بتاعى أنا وبس